€320,000 f’reklamar minn Project Green

Jibqa’ mistur kemm influencers tħallsu biex irrekklamar għadd ta’ inizzjattivi ta’ Project Green The post €320,000 f’reklamar minn Project Green appeared first on Newsbook.

Project Green nefqet iktar minn €320,000 marbuta mal-informazzjoni u r-reklamar, mifruxin fuq tliet snin. L-ammonti marbuta ma’ informazzjoni u reklamar kienu ta’ €122,000 fl-2023, €107,176 fl-2024, u €92,238 fl-2025.

Il-Ministru għall-Ambjent Miriam Dalli spjegat fil-Parlament li kemm-il darba kellha kritika biex “jesponu iktar l-ispazji l-ġodda ħalli n-nies ikunu jafu bihom iktar u jgawduhom mal-familji tagħhom”. Dan apparti li hemm proġetti li l-entità hi obbligata tinforma u tirreklama dwarhom ladarba hemm użu ta’ fondi Ewropej.

L-informazzjoni xxandret jew kienet ippubblikata fuq id-diversi mezzi tax-xandir, inkluż televiżjoni, radju, mezzi soċjali kif ukoll materjal stampat. Fil-materjal stampat hemm inkluż il-‘hoarding’ tad-diversi siti li kien hemm u għad hemm għaddej ix-xogħol fuqhom madwar il-pajjiż, kif ukoll sinjali ta’ informazzjoni li jitwaħħlu fil-ġonna. Il-Ministru spjegat li x-xogħol inkwistjoni dejjem ingħata permezz ta’ proċedura ta’ tender jew direct order, skont kif applikabbli, u f’konformità sħiħa mal-proċeduri u r-regolamenti tal-akkwist pubbliku.

Project Green qed taħdem fuq portafoll ta’ 118-il proġett differenti b’investiment maħsub ta’ madwar €350 miljun, li fit-totalità tagħhom iġibu medda art ta’ madwar 1.7 miljun metru kwadru – daqs ta’ 240 grawnd tal-futbol. L-implimentazzjoni ta’ dawn il-proġetti kollha ssir fuq medda ta’ snin.

L-allokazzjonijiet finanzjarji għas-sena 2026 huma kif jirriżultaw mill-estimi.

Project Green qed timmaniġġja 19-il sit attiv u tinsab fil-proċess li tibda x-xogħol fuq erba’ siti oħra, b’numru ferm akbar ta’ proġetti jiġu implimentati simultanjament f’diversi lokalitajiet madwar il-pajjiż.

Huwa mmirat li matul din is-sena jitlestew proġetti oħrajn mill-entitajiet tal-Ministeru għall-Ambjent li mistennija jinkludu:

• Ir-Riserva Naturali tas-Simar (San Pawl il-Baħar)
• Ġnien Dun Nicholas Cachia (Is-Siġġiewi)
• Ġnien Misraħ Karmelitani (Iż-Żurrieq)
• Estensjoni tal-Park tal-Familja f’Bengħajsa (Birżebbuġa)
• Ġnien il-Larinġ (Ħal Lija)
• Ġnien il-Madonna tal-Vitorja (Pembroke)
• Park tal-Mitħna (L-Imqabba)
• Park ta’ Baħar iċ-Ċagħaq (In-Naxxar)
• Ġnien il-Koppin (Ħal Kirkop)
• Ġnien Għarram (Ħaż-Żebbuġ)
• Ġnien iż-Żgħożija (L-Imtarfa)
• Ġnien it-Tabib Mario Tabone (Is-Swieqi)
• Għaxaq Picnic Site (Ħal Għaxaq)
• Rainwater Harvesting Park (Għajnsielem)
• Parti minn Park l-Inħawi (Il-Fgura)
• Proġett f’Għajnsielem u ieħor f’San Ġiljan li qed isiru bħala parti mill-Iskema ta’ Tħaddir Urban għall-Kunsilli Lokali
• Proġett Silva f’żewġ żoni afforestati fl-Aħrax ta’ Ġewwa u l-Miżieb (Mellieħa)
• Xogħlijiet ta’ tisbiħ fiż-żona Saver Zarb f’San Ġiljan, fil-Barrakka ta’ Fuq u fil-Barrakka t’Isfel
• Roof Garden fuq il-binja tal-Liċeo l-Ħamrun
• Ċentru tal-Viżitaturi (Il-Marfa)
• Ġnien u spazju miftuħ fid-daħla tal-Birgu
• Il-proġett ta’ Green Living Hub Malta (Ħaż-Żebbuġ)

Ix-Shadow Minister, Rebekah Borg staqsiet lill-Ministru r-raġuni għalfejn intefqu biss €2.3 miljun minkejja li fl-2024 kien hemm allokazzjoni kapitali ta’ €24.7 miljun għall-aġenzija Project Green. Mitluba tispjega r-raġunijiet għal dan in-nuqqas ta’ nfiq, kif ukoll tispeċifika liema kienu dawk il-proġetti li kienu ppjanati li jsiru b’dawn il-fondi u li minħabba dan in-nuqqas ta’ nfiq, ġew imdewma, posposti jew ikkanċellati, il-Ministru Dalli naqset milli tagħti tweġiba għal dan.

Il-Gvern, inkluż il-Ministeru għall-Ambjent, kienu rrifjutaw li jagħtu dettalji dwar l-ammont ta’ nfieq għall-influencers. Ir-risposta identika għat-Talba għall-Informazzjoni permezz ta’ FOI kienet li l-informazzjoni mitluba ma tistax tingħata għaliex mhux ċar x’dokument qed jintalab.

Il-Gvern jirrifjuta li jgħid kemm tħallsu l-influencers

Għal inizjattiva waħda biss, il-preżentatur Ricky Caruana ngħata €10,000 biex jippromwovi s-siġar. Madanakollu, hemm ħafna iktar influencers li jirreklamaw għadd ta’ inizjattivi ta’ Project Green.

The post €320,000 f’reklamar minn Project Green appeared first on Newsbook.

Read the full article at the original source