“Sens ta’ tama mgeżwer fir-rabja” – Suldat Ukren u protagonist ta’ film f’Malta

Il-Fondazzjoni għall-Komunità Ukrena f’Malta, flimkien mal-Kummissjoni Għolja tar-Renju Unit, organizzat wiri speċjali tal-film 2000 Metres to Andriivka. The post “Sens ta’ tama mgeżwer fir-rabja” – Suldat Ukren u protagonist ta’…

Il-Fondazzjoni għall-Komunità Ukrena f’Malta, flimkien mal-Kummissjoni Għolja tar-Renju Unit, organizzat wiri speċjali tal-film 2000 Metres to Andriivka.

Il-film ġie pproduċut minn Mstyslav Chernov, li kien rebaħ Oscar għad-dokumentarju ’20 Days in Mariupol.’

Il-film isegwi grupp ta’ suldati Ukreni waqt li javvanzaw fuq medda ta’ 2,000 metru ta’ foresta ffortifikata sabiex jilliberaw il-villaġġ ta’ Andriivka waqt il-kontroffensiva tal-2023.

Il-wiri tal-film kien segwit minn sessjoni ta’ mistoqsijiet u tweġibiet ma’ Kostiantyn Chumakov, magħruf bil-callsign ‘Piro’, li ffilmja x-xena drammatika tal-ftuħ bil-kamera mwaħħla mal-elmu tiegħu, u Alex Babenko, wieħed mill-videografi tal-film u wkoll ko-produttur.

L-avveniment kien indirizzat mill-Viċi Kummissarju Għoli tar-Renju Unit Alex Partridge u minn rappreżentant tal-Ambaxxata Ukrena f’Ruma. Għalih attendew ukoll l-Ambaxxatriċi Irlandiża għal Malta Caroline Whelan, rappreżentant tal-Ambaxxata Olandiża f’Malta, u l-Konslu Onorarju tal-Ukrajna, Ian Scerri.

Il-wiri sar fi Spazju Kreattiv fil-Belt Valletta.

“Sens ta’ tama mgeżwer fir-rabja” – Kostyantin Chumakov

Is-sessjoni ta’ Q&A kienet immexxija mill-ġurnalist tat-Times of Malta James Cummings.

Chumakov, li ndarab serjament waqt il-battalja, qal li wieħed qatt m’għandu jaqta’ qalbu. “Anke jekk il-gwerra ddum ħajjitna kollha, irridu ngħixu.”

Huwa kien jgħix il-Polonja meta bdiet l-invażjoni Russa fi Frar tal-2022. “Ma kinitx deċiżjoni faċli li nerġa’ lura lejn l-Ukrajna, iżda rrealizzajt li n-nies kollha li kienu jfissru xi ħaġa għalija kienu fl-Ukrajna u kellhom bżonn l-għajnuna tiegħi,” qal lill-udjenza.

‘Piro’ qal li inizjalment kien inkwetat minħabba n-nuqqas ta’ ħiliet militari, “iżda malli qsamt il-fruntiera ma kien hemm l-ebda dubju f’moħħi li kont qed nagħmel dak li kien sewwa.”

Huwa qal li, fiż-żmien tal-battalja, qatt ma kien jimmaġina li l-filmati li kien ħa bil-kamera tal-elmu tiegħu kienu se jintużaw f’film. Kien biss madwar ħames xhur wara l-battalja, meta kien qed jirkupra l-isptar, li l-produtturi kkuntattjawh u talbuh il-filmati tiegħu.

Mistoqsi minn fejn ġejja r-reżiljenza tiegħu, Chumakov qal: “Hija mistoqsija kkumplikata. Toriġina minn sens ta’ inġustizzja, li xi ħadd ieħor iddeċieda dan kollu għalik. Hija bħal forma ta’ tama mgeżwra fir-rabja. Tħossok imbeżża’, iżda taf li ma tistax tieqaf u trid tibqa’ tavvanza.”

Chumakov issa jgħix f’Odesa, iżda l-gwerra għadha tinħass fil-qrib. “Filgħodu mmorru ngħumu u billejl infittxu kenn mill-missili,” qal.

Mistoqsi kemm hu diffiċli li terġa’ lura għall-ħajja normali wara l-battalji mdemmin, Chumakov wieġeb: “Ma nafx, għax il-gwerra għadha ma spiċċatx. Forsi nista’ nwieġeb din il-mistoqsija aktar ’il quddiem, meta t-theddida tkun għaddiet, iżda għalissa għadha preżenti.”

Mistoqsi x’messaġġ ried li l-udjenza tieħu magħha, Chumakov qal: “Il-messaġġ li s-sens ta’ sigurtà huwa fraġli ħafna u l-affarijiet jistgħu jinqalbu ta’ taħt fuq fi kwalunkwe mument. Iżda wkoll li trid tiġġieled għall-affarijiet li temmen fihom.”

“Kull wieħed minna kellu jagħmel għażla” – Alex Babenko

Il-ġurnalist Alex Babenko, li ngħaqad mal-avveniment mill-Ukrajna b’mod remote, tkellem dwar ir-rwol tiegħu fil-ġbid ta’ 2000 Metres to Andriivka, u rrakkonta kif it-tim kellu jidħol u joħroġ miż-żona perikoluża tal-ġlied f’vettura armata.

“Qatt ma ħlomt li nsir ġurnalist tal-gwerra,” qal, “iżda fhimt li kien hemm bżonn ta’ nies b’ħiliet ġurnalistiċi biex jirrappurtaw dwar il-gwerra f’pajjiżi.”

“Meta l-gwerra tasal f’pajjiżek ma jkollokx ħafna għażliet: Xi wħud jagħżlu li jiġġieldu, oħrajn jagħżlu li jgħinu lil dawk li qed jiġġieldu, filwaqt li oħrajn jaħarbu. Il-gwerra waslet fi djarna u kull wieħed minna kellu jagħmel għażla.”

Babenko tkellem dwar l-ambjenti diffiċli li fihom jaħdmu l-ġurnalisti tal-gwerra u qal li, f’Andriivka, is-suldati tawhom walkie-talkies u kienu jgħidulhom x’għandhom jagħmlu biex jibqgħu ħajjin. “Ikollok ħafna esperjenza, iżda dejjem huwa importanti ħafna li tisma’ dak li qed jgħidulek is-suldati,” qal.

The post “Sens ta’ tama mgeżwer fir-rabja” – Suldat Ukren u protagonist ta’ film f’Malta appeared first on Newsbook.

Read the full article at the original source